اُن کی مہک نے دل کے غنچے کھلادیئے ہیں
جس راہ چل گئے ہیں کوچے بسا دیئے ہیں
اک دل ہمارا کیا ہے آزار اُس کا کتنا
تم نے تو چلتے پھرتے مُردے جِلادیئے ہیں
آنے دو یا ڈبو دو، اب تو تمہاری جانب
کشتی تمہِیں پہ چھوڑی ، لنگر اٹھا دیئے ہیں
میرے کریم سے گر قطرہ کسی نے مانگا
دریا بہادیئے ہیں ، دُر ، بے بہا دیئے ہیں
اُنکے نثار کوئی کیسے ہی رنج میں ہو
جب یاد آگئے ہیں سب غم بھلا دیئے ہیں
اللہ کیا جہنم اب بھی نہ سرد ہوگا
رو رو کے مصطفےٰ نے دریا بہا دیئے ہیں
ملکِ سخن کی شاہی تم کو رضا مسلَّم
جس سمت آگئے ہو سکّے بٹھا دیئے ہیں
